إيه الفكرة؟

مفيش فكرة جديدة ولا حاجة، كل الحكاية إننا زهقنا زيكم بالظبط من كمية المواقع اللي بنشوفها مش معمولة بطريقة كويسة أو بشكل إحترافي سواء كانت مواقع بسيطة مش محتاجة مجهود كبير، أو مواقع كبيرة وفيها مشاكل كتير ومحدش فاضي يصلحها. وطبعا ناس كتير بتدور على مطورين شاطرين – زيـنا بس مش هنقول – يساعدوهم يعملوا المواقع بتاعتهم بكواليتي عالية من غير مجهود وتضييع وقت كتير وبتكلفة معقولة ومنطقية “مقولناش رخيصة على فكرة خد بالك”. فجتلنا الفكرة الخزعبلية العادية دي إننا نعمل “الموقع” علشان نخلص من القصة دي ونحاول نساعد أي حد عايز يعمل موقع.

إحنا مؤمنين إن المشكلة مش في إنك تعمل موقع وخلاص، لأنك ممكن ببساطة تشتريه جاهز أونلاين وتضيف عليه شوية تعديلات وتظبطه وخلاص هيشتغل مش هيزعل، لكن المشكلة الحقيقية إنك تلاقي حد تثق فيه ويكون فاهم وعنده خبرة في كيفية صناعة المواقع المحترفة أساسا – زيـنا برضو بس هنقول المرة دي – ويقدر يساعدك من الناحية الفنية أو التيكنيكال إنك تعمله بالشكل التقني المحترف ويوصل بيه للشكل اللي إنت شايفه مناسب ليك ولمشروعك حتى لو كان الحل إنك تشتريه جاهز فعلا وتلاقي حد تناقشه في التعديلات والتفاصيل والإختيارات عشان تقدر توصل بموقعك للي إنت عايزه وتتفرغ لحاجات تانية زي التسويق والمبيعات وإدارة العمليات وخدمة العملاء وغيره.

فياريت نعدي المرحلة دي بقى في أسرع وقت عشان بجد زهقنا والموضوع حقيقي مش صعب أوي كده ..

عايز موقع؟ .. إحنا “الموقع” .. بس كده!