مين فريق الموقع بقى؟

إحنا تيم صغير من مهندسي ومطوري صناعة تكنولوجيا المعلومات – كلام كبير أهو – كل واحد فينا متخصص في تكنولوجيا معينة وشاطر فيها لدرجة إن فيه ناس عندها خبرة أكتر من 10 سنين. وكل مرة بنشرب فيها قهوة مع بعض على زووم، واحد فينا يحكيلنا على مشكلة بتقابله في مشروع أو عميل عنده مشكلة معينة ودايما كانت معظم المشاكل دي متكررة بشكل يزهق الحقيقة، لدرجة إننا بقينا نعمل نوتس نكتب فيها الحلول لنفس المشاكل ونفكر بيها بعض كل ما واحد فينا تقابله نفس المشكلة ومن كتر الزهق عملناها جيم إن أكتر واحد فينا يقع في نفس المشكلة أو يسأل نفس السؤال يحاسب هو على القهوة.

وفي قعدة من القعدات واحد من التيم – منه لله بس أما نفتكر هو مين عشان مش عايز يعترف على نفسه – قال فكرة إننا نخصص وقت نساعد فيه كل الناس اللي واقعة في نفس المشاكل دي – بما إننا زهقانين يعني من كتر الفرحة – ونحاول نبسط الدنيا طالما عدي علينا كتير واللي كان صعب قبل كده ممكن بالنسبالنا يبقى بسيط من كتر ما لبسنا في الحيط فالأفضل إنك تلبس مع حد خبرة مش حد جديد في المجال .. قال يعني هتفرق.

ومش بس كده، لأ ده هو نفس الشخص اللي إقترح فكرة إننا نعمل “الموقع” بحيث يبقى منصة لكوكب الأرض كله نستغل بيها طاقة الزهق السلبية اللي عندنا ونحولها لطاقة إيجابية منشكحة رادار نساعد بيها البشرية في عمل أي موقع بأي تكنولوجيا .. وآدي النتيجة!